A la prima com en estiu, lo casau qu’auhereish hèras plantas que podem utilizar tà har pintrura vegetau. Mei respectuosa de l’environament, aquera activitat que permet tanben aus mainatges de’s brembar de quauque fruta e legumes deu casau.
Purmèra estapa : un passeipeu casau.
Que hè bèth temps, qu’ei lo parat de’s passejar peu casau e de cercar flors, fruta o legumes qui van poder balhar un beròi pigment a la nosta pintrura.
Que causir tà obtiéner diferentas tintas ?
L’espinac tà obtiéner un verd clar.
Lo caulet roi o lo blet tà obtiéner un bordèu transparent.
Las peladuras de ceba tà obtiéner un jaune iranjat.
Lo gerànium roi o la passaròsa tà aver diferentas tintas de ròse.
La heuç o l’ortiga tà aver un verd mei espés.
La fruta roja tà obtiéner un roi (o vriulet segon las macalulas).
Lo sahuc tà obtiéner un beròi vriulet.
Dusau estapa : un drin de cosina.
Tà poder tréger lo shuc de las flors, de la fruta o deus legumes, que’vs cau ua caishòla, un mesclader, ua forqueta, ua passadera, un topin tà arrecaptar lo shuc e aiga.
Quauques tecnicas :
Ceba : hicar las peladuras en ua caishòla, ajustar un hons d’aiga (lo hons d’un cuu de veire), har còser 20 minutas puish arrecaptar lo shuc en un topin. Qu’obtienetz un jaune iranjat deus beròis.
Caulet roi : mixar lo caulet dab un drin d’aiga, hicar lo caulet en un eishugader, ajustar un drin d’aiga puish esprémer hòrt l’eishugader au dessús d’un topin tà tréger lo shuc.
Fruta roi : còser las macalulas 10 minutas dab aiga tà las amodir puish, dab ua forqueta, esglachar las macalulas e filtrar dab la passadera.
Flors : plaçar ua o duas punhadas de petales en ua caishòla, ajustar un veire d’aiga e har lhevar lo borit 10 minutas de reng. Filtrar dab la passadera tà arrecaptar lo shuc colorat.
Tresau estapa : plaça a la creacion.
Com ac vedetz, crear pintrura vegetau dab mainatges a casa o a l’escòla n’ei pas tan complicat. Un còp la pintrura hèita, que podetz deishar desbondà’s l’imaginacion dab un drin de materiau : calamets, boçons de lèuge, pincèus … a la vòsta causida.
Tà’us qui n’an pas nat casau, nat chepic. Que podetz obtiéner ua beròja pintrura vegetau dab espècias, un drin d’aiga cauda e haria se la voletz espessir.
Amusatz-ve com cau !
Gambart Alizea