A l’ora d’ara, los masques son reservats per los que sònhan. La cordura se transmet tradicionalament en familha : las ainadas sabon fabricar de masques artisanals en teissut. Basta de trapar un « patron » e d’i passar un pauc de temps, un còp que lo material necessari es recaptat.

L’AFNOR ditz las precaucions de prene per qu’un masque artisanal siá confòrme. Lo modèl prepausat aquí respècta la màger part d’aquelas preconizacions : se fa amb de teissut de preferéncia en coton pas tròp espés. Lo cal poder lavar a 90°C aprèp cada sortida per lo tornar utilizar.

Material necessari :

– un cairat de teissut  (linçòl per lo modèl mostrat) de 20 cm x 30 cm

– de fial per cóser, un parelh de cisèls, espingas,…

– 2 bandeletas de coton de 2×80 cm o ben d’elastic se capitatz de ne trobar

– una benda sopla metalisada de 15 cm (per far la forma del nas)

Debanament de la fabricacion :

– copar dins un linçòl un tròç de 20 cmx30cm

– far un òrle sus las doas largors

– a 4 cm del bas, plegar lo teissut per dessús, l’alisar (fòto 1)

– sus la mitat d’en naut (fòto 2), fronzir amb lo fèr per alisar 3 plecs (4 cm, 1cm tres còps)

– plegar lo tot en dos a 12 cm del bas

– a 11 cm del bas, far una picada per inserir la benda metalisada ; cal poder la tirar abans de lavar lo masque (fòto 3)

– picar las bandeletas suls costats (fòto 3) per assemblar la partida nauta a la partida bassa.

Utilizacion :

– inserir la benda metalisada (daurada sus la foto 3), puèi un mocador getable (o mai) dins la pòcha.

– estacar las bandeletas per far tenir lo masque sul nas e la boca.

– per tirar lo masque aprèp utilizacion plan pensar a desfar los nosèls e de tocar pas lo davant.

– tirar lo mocador en papièr e la benda en metal abans de lavar lo masque a la bugada a 90°C

– esperar que lo masque siá sec per tornar sortir…..

Fòto 1Fòto 2Fòto 3

Monica Bissay