La permacultura es un concèpte que visa a fargar de sistèmas agricòlas durables e autonòms. La tòca es de s’inspirar de la natura per cultivar e tornar crear un ecosistem a l’imatge de çò que podèm trapar dins un mitan natural. Existís mantuna tecnica de permacultura, mas aquí nos anam interessar a la de Philip Forrer que demòra dins Aude. Es partit del constat que dins la natura i aviá besonh de res per que las plantas, los arbres e las flors posquèsson créisser. S’avisèt que los sòls èran totjorn cobèrts e observèt que de joves getèlas creissián sus d’arbres mòrts… Vaquí sa tecnica, coma o ditz : sens labor, sens fotjar, sens engrais… e lo tot dins lo respècte de la natura e de l’environament.

Procediment :

1) Dins l’espaci qu’avètz causit per faire vòstra turra, faire una trencada de 30/40 cm.

2) Quitar la tèrra e la metre sul costat, per la poder tornar metre aprèp.

3) Metre de fusta en descompausicion, que sètz anats cercar dins la forèst. Ne metre una bona espessor.

4) Puèi, per comolar lo void, metre de brancas en descompausicion, de fuèlhas e brancas trissadas, mas tanben de residús de tondeson d’èrbas. Es per comblar l’aire que se trapa entre los socs. Mas vos es possible tanben de metre de carton, de degalhs de cosina, en fait tot material qu’es descompausable.

5) Cal plan aplatir amb una maça, que i aja pas d’aire entre la fusta. S’es tròp sèc, cal asagar.

6) Tornatz metre la tèrra qu’avètz mesa de costat de per abans sus 20 cm.

7) Per dessús, metre 20/30 cm de «palhatge» per protegir de la secada : d’èrbas de tondeson, de trissat de bartasses qu’anatz mesclar amb d’agulhas de pin (segon el es lo repais preferit de las plantas). Mesclatz tanben de degalh de cosina que se van descompausar dins la turra.

Vaquí la vòstra turra es acabada !

Per semenar : cavar per arribar a la tèrra, quand i sètz cavar un selhon e semenar las granas, tornatz botar la tèrra per-dessús. Mas cal faire mèfi, vos cal esperar que sián pro grandas per las poder recobrir amb la cobertura vegetala.

Per plantar : tirar los elements per arribar a la tèrra e i plantar dirèctament la planta. Tornar metre la cobertura mas pas de tròp, vos cal faire mèfi de lor daissar pro d’espaci per poder butar sens èsser quichat pel palhatge.

Solanja Richez