Dins l’article que seguís anatz aver un resson d’entrevistas qu’es pas de prene coma sciéncia exacta ni mai per saber tot potent.

M’agrada de ligar mon percors d’anciana Calandrona a lo de Calandrina. Demòri en contacte amb d’ancians escolans e me soi dich que seriá plan d’aver diferents vejaires. Faguèri una mena d’enquèsta a travèrs qualques personas sus l’impacte qu’aguèt l’immersion per eles. Vaquí un resumit de las entrevistas.

Per rapòrt a la dintrada a Calandreta çò que sortís primièr es una nocion de transmission entre las generacions, que siá dels grands o dels parents. La volontat de partejar una cultura amb los enfants menèt d’unes parents a escolarizar lors enfants a Calandreta.

Quand lor ai demandat lor sentit cap a l’immersion coma mejan per aprene una lenga, las responsas foguèron positivas. D’unes me diguèron «Tot se passa en occitan, nos fasèm quitament repotegar en occitan ! Aguèri l’impression d’aprene l’occitan coma lo francés». Es plan aquò l’immersion una preséncia de contunh de la lenga subretot quand dintram dins lo domeni afectiu.

Una autra responsa mai scientifica foguèt : «lo cervèl a encara tota sa plasticitat e permet de passar aisidament d’una lenga a l’autra», es una de las consequéncias d’un bilingüisme aboriu, quand una lenga es apresa tre la pichona enfància.

Un autre testimoniatge relèva de l’input «Aprenguèri mai l’occitan en 8 ans a l’escòla que non pas l’anglés en 13 ans » a mai apondèt que quitament se fa 10 ans que lo parla pas pus, l’occitan li tòrna aisidament.

L’immersion es un metòde que permet aisidament d’aprene una lenga mas que se passa per l’apprendissatge d’una autra lenga ?

Per d’unes Calandrons foguèt complicat al moment d’escriure en francés. L’occitan èra «un fren per aprene lo francés», mas lor portèt plen de causas cap a la dubèrtura d’esperit, balha l’enveja d’aprene mantuna autra lenga.

Quitament se l’occitan a pas una plaça dins lor vida uèi, la màger part dels ancians Calandrons entrevistats, ne gardan un bon sovenir. Es per tot lo monde una lenga ligada a una cultura, un patrimòni e d’emocions positivas. Ne gardan çò melhor.

Fòto tirada del jornal de Pirenèus Atlantic del 25 d’abrial de 2006

Clara-Lina ZIMPFER