D’aprèp lo diccionari, téner lo let es èsser mèstre del jòc, aver la paraula, l’iniciativa. Per presentar son projècte a las Calandretas que se sona “Tèni lo let” Joan Carles Codèrc prepausa de videòs : una per talhièr. Dins lo primièr, mostra son quasernet de pintura que i met dedins d’idèias. Es a dire quicòm que pertòca la persona per la daissar s’exprimir dins una produccion plastica en far lo ligam entre l’illustracion e l’escritura. Per aquò far cal pescar una frasa de 3 a 6 mots que nos passa pel cap o sus çò que volèm per deman. Dins lo primièr talhièr, nos mostra cossí emplenar la pagina amb l’escritura d’aquela frasa, primièr en escritura ligada, una color per frasa. Dins lo segond talhièr escriu en letras bastons o en majusculas capitalas amb una espessor de la meteissa color puèi mesclada. Dins lo tresen, utiliza d’apleches coma un marcador, d’adesiu, un pincèl-bròssa, una greda pastèl per far las letras. Amb la greda, se veson los traches de la fusta que servís de supòrt al fuèlh. La tòca es de far de letras grandas e regularas en talha e dins l’espessor de lor traches. Enfin, se pòt utilizar de tecnicas per que las letras se respondon las unas las autras. L’ensag se fa sus un fuèlh grand (A3) abans de lo tornar far sul quasernet.

A prepaus de Joan-Carles Codèrc :

Dessenhaire, paretalista, plastician, Joan-Carles Codèrc es un artista nascut a París e originari d’Avairon. Aprèp l’escòla de las Bèlas Arts de Marselha, estudièt la tipografia a Brussèlas. Per el, la creacion es un mejan de pensar la seuna epòca. En fervent defensor de la lenga d’òc qu’ausiguèt parlar dins son enfància, illustra sos mots, sas paraulas en resson del temps nòstre. S’inscriu a la seguida d’artistas aital que René Duran, Ben Vautier, Jaume Privat mas en apondre d’imatges per far emergir un espaci pictural occitan que li sembla encara teune. S’estaca a de tèmas coma lo territòri, la lenga, los mots e la natura.

https://www.jeancharlescouderc.fr/

https://lodiari.com/joan-carles-coderc/

https://www.aveyron-culture.com/diffusio/contact/luc/jean-charles-couderc_TFO128381.php

Lo projècte “Tèni lo let” qu’estó perpausat aus mainats en quauques escòlas. Resultat ? Ua vertadèra escaduda ! Qu’avèvam enveja de partatjar aqueras òbras dab vosautes. N’ac podem pas tot amuishar mes que mercejam los regents peu partatge e que felicitam los mainats peu beròi tribalh.

Òbra de Milòs, classa de Natalià Mineur

Òbra de Lili (classa de Natalià Mineur).

Òbra de Mailis, CM2 (classa de Lidia Hernandez)

Òbra de Sinaï, CM2 (classa de Lidia Hernandez)

Classa de Maria-Pèire CRANSAC

Alizèa Gambard, Monica Bissay, Sandrina Lavandet, Clara-Lina Zimpfer