Vaquí las consignas per far, per ton sol plaser o amb los enfants, un polit quadre gràcias als grafismes qu’as jos lo nas. Que siás a l’ostal, en classa, en vacanças, o endacòm mai, pòdes far aquesta òbra d’art en t’inspirant de ton environa.

Per aquò far, te caldrà : – un fuèlh de brolhon – un polit fuèlh blanc – un compàs – un gredon gris – un gredon o un estilò negre – un feutre negre e un feutre roge – una règla – doas o tres colors diferentas de feutres (o de pinturas pels mai menimoses d’entre vosautres…)

  1. Passeja te per trapar a l’entorn de te diferents grafismes. Ne dessenhar 8 que t’agradan sus lo fuèlh de brolhon.
  2. Sul polit fuèlh blanc, traças de cercles (totes del meteis rai) que s’encastran. Te cal aver al mens uèit cercles. Puèi, tornas los passar al gredon o a l’estilò negre.
  3. Traças doas linhas corbas en travèrs de la pagina : aital las linhas van traversar los cercles per fin de tornar descopar lo fuèlh en zònas mai pichonas.
  4. Ne tornar passar una al feutre negre e una al feutre roge.
  5. Reprodusisses cada grafisme (qu’as dessenhat sus ton fuèlh de brolhon) un còp, dins una zòna.
  6. Un còp que cada grafisme apareis sul polit fuèlh, completas las zònas que demòran voidas : per aquò far, las pòdes emplenar segon de grafismes que t’agradan mai que d’autres.
  7. Causisses doas o tres colors de feutres que t’agradan e coloras cada grafisme amb aquelas colors.

Per mai d’explicas, e en imatges, pòdes agachar la videò de Isabela Robin :

Raquèl MARTIN