Adieusiatz brave mond ! Espèri qu’anatz plan e qu’aprofechatz del des-confinhament per tornar prene lo solelh !
Per festejar aquò uèi vos vau presentar un espòrt occitan plan conegut lo TAMBORNET !!
Tot comencèt dins Grècia antica amb lo jòc de pauma, aujòl del tenís, pelòta basca e tambornet. Aquel jòc consistissiá a se tornar mandar una bala amb la man nuda o vestida d’un gant de cuèr, sus un terren delimitat. Per marcar lo punt caliá mandar la bala sul terren de l’adversari pro rapidament per qu’aja pas temps de l’agantar. Lo jòc de pauma devenguèt popular en França a l’Edat Mejana e evoluïguèt dins Occitània cap en 1860 que l’aisina que balha son nom a l’espòrt foguèt estandardizada dempuèi Mèsa.
Lo tambornet es constituit d’una pèl per far rebombir la bala, aquela pèl es fixada sus un cercle de fusta. Los mai modèrnes son faches de tela e de plastic, una punhada de cuèr es vissada al cercle per una melhora presa en man de l’aisina.
Es Max Roqueta famós escrivan occitan, jogaire de tambornet dempuèi pichon que faguèt tot son possible per lo reviscòl d’aquela pratica fàcia a l’espandiment dels espòrts estrangièrs en Occitània.
E foguèt en 1923 qu’apareguèt la primièra federacion de tambornet per de Montpelhierencs que resistiguèt pas gaire de temps pr’amor de la crisi de 1930 que botèt un còp violent a la pratica del tambornet.
Max Roqueta decidiguèt doncas de montar la federacion Francesa de tambornet en 1938 que servirà de simbòl a la resisténcia culturala del occitans e de la salvagarda d’aquelas practicas tradicionalas.
Dins la mira de far reconéisser a totes la practica coma un vertadièr espòrt, Max Roqueta se sarrèt dels jogaires de tamburello italian, per organizar de torneges mai bèles. Es en 1954 que de règlas oficialas foguèron escrichas e en 1988 la federacion internacionala de tambornet, qu’a son sèti en Itàlia, foguèt montada.
Cossí jogar :
Doas còlas de cinc jogaires se fan fàcia sus un terren de 36 mètres de long per 16 mètres de larg en sala o 80 mètres de long per 20 mètres de larg en exterior.
Una linha mediana marcada al sòl delimita lo terren de cada còla.
Los punts se comptan coma al tenís : 15 – 30 – 45 e jòc.
La partida es ganhada quand arribatz a 13 jòcs ganhant.
Per ne saupre mai sus las règlas : http://www.sport-tambourin-cd34.com/le-sport/regles
Dempuèi 1990, de competicions europencas de tambornet que son organizada cada annada.
A l’ora d’ara lo tambornet es fòrça jogat dins las escòlas Calandreta de lengadòc pr’amor que la Liga de tambornet Lengadòc-Rossilhon establiguèt un partenariat amb elas dins la mira de far descobrir l’espòrt als mai joves.
Es l’escasença cada annada d’un grand torneg al mes de junh davant lo CIRDÒC a Besièrs, que las escòlas de tota l’airal i venon participar.
Amb tot aquò podèm esperar que la practica del tambornet contunhe a se passar de generacion en generacion.
Angelò Bordin