Uèi profiechi d’aquela jornada primaverala per metre las patanas a l’òrt. Patanas, patatas, trufas segon lo canton. Existís un nombre bèl de varietats : Binge, Mona Lisa, Carlòta.
Ne podèm trapar d’aborivas de mai tardièras, de la carn fèrma o que s’espotisson. Al gost de cadun !
Rampelam qu’a la debuta de l’ivèrn, metèri de fem a l’òrt per l’enriquesir. Un còp cada 2 ans me pareis plan. Aquí èra de fem de fèdas de mon cosin, en sabent qu’aquel de caval es lo mai ric.
Mèfi ! Cal que la tèrra siá pas tròp freja : 8 grases minimum. Per ieu dins mon canton del Menèrbes èra a 11 grases doncas va plan.
Vaquí doncas ma tecnica : fau un riu pichon amb un rabassièr. M’ajudi d’una còrda e de dos bastons per far lo mai dreit possible. Es aquí dedins que vau pausar mas patanas.
Doblidèri de vos parlar de la germinacion. Per ajudar a la creisséncia val mièlhs metre en tèrra de patanas ja germenadas. Las metèri un quinzenat de jorns a la remesa dins l’escuresina. Ara cal far mèfi de posicionar la patata amb sos grelhs los pus bèls cap en naut.
Daissi un vintenat de centimètres entre cada plant, en fach la longor de mon otís. Aquò fach cobrissi amb un barrejadís de tèrra e de compòst pas tròp espés e de palha.
Lo compòst lo tirèri la velha, lo daissèri se far pendent 2 ans. Ara me fa una bona resèrva per mas plantacions.
Quand las patanas grandiràn las caldrà butar en fasent montar la tèrra un pauc de cada costat de las plantas per cobrir los pès. Formarà un riu que permetrà d’asagar en cas de fòrta calor la palha ajudarà per gardar lo fresc. Gaitarai plan regularament que i aja pas de dorifòrs gormandàsses d’aquelas fuèlhas.
Quand las patanas auràn florit e que s’aflaquiràn serà l’ora de la primièra recòlta : nos regalarem d’aquelas patatas novèlas : fritas, bolhidas amb un pauc d’òli d’oliva…
Un plaser simple que nos congostarà !
Amèlia Chabaud e la còla.