20 ans, un plan polit anniversari!

L’escòla Calandreta Dagtenca celebrèt son 20n anniversari lo 4 de junh amb una jornada de fèsta pensada pels pichòts e ancians calandrons, mas tanben pels membres fondadors de l’escòla, associatius, còla pedagogica, amics e partenaris de la calandreta dempuèi sa creacion.

Après l’inauguracion oficiala de l’exposicion sul projècte calandreta a l’ofici de torisme d’Agde, seguiguèt un moment de cant e dança intergeneracional. Un passa-carrièra musical darrièr lo Cavalet, qu’es l’animal totemic protector dels calandrons d’Agde, menèt lo mond dusca al molin dels avesques sus las ribas del flum Erau. Aquí se dobriguèt oficialament la fèsta amb los membres fondators e actuals de la calandreta.

Long de la jornada èran previstas d’animacions ludicas coma d’obradors de danças, de jòcs, de pintura sus còdols, de lecturas occitanas amb Los Amics o encara un talhièr d’ajustas sus carriòlas amb l’escòla d’ajustas dagtenca.

En debuta de tantossada un filmòt «Calandrons un jorn calandrons totjorn» creat per d’ancians calandrons d’Agde, foguèt projectat. L’escasença de se sovenir dels temps joioses passats e de pausar un agach positiu sus l’avenidor. Aprèp un escambi fòrça cargat d’emocions amb los ancians calandrons i aguèt un fum de suspresas : cants, danças e gostar amb de segur la famosa còca d’anniversari !

Clavèt la jornada una serada de retrobadas calorosas organizadas al dintre de l’escòla. Un balèti endiablat amb Humpty Dumpty, lo «sound-system» occitan faguèt bolegar pichòts e grands. Los rescontres e las discutidas ritmèron aquela polida serada al cap de la nuèch.

Òsca a la Calandreta Dagtenca per tot aquel vam !

Articles recommandés

Laisser un commentaire

Votre adresse e-mail ne sera pas publiée.