Carnaval… tres d’un còp !

Apuèi doas annadas « aculturadas », aquí que Carnaval arriba en nombre ! E òc, ongan, festegèri Carnaval non pas un… mas tres còps ! Un biais de far la fèsta, plan segur, e tanben d’apréner fòrça causas.

Rodés

Lo 22 de març se debanava lo Carnaval de la Calandreta rutenenca. Coneissiái ja la data dempuèi un mes e, còp d’astre, èri de remplaçament lo jorn que se fasiá. La fèsta èra prevista dins la vesprada, amb un passa-carrièra de tota l’escòla pel barri en cants e musicas, puèi lo Jutjament de Carnaval amb totas las familhas convidadas e, per acabar, un repais partejat.

En debuta d’aprèp-miègjorn, nos costumèrem los enfants e ieu. Manquèri de m’escanar de rire quand los vegèri desguisats en Arsène Lupin, en japonesa, e quitament en portaire de pizzas amb tot son cargament sul carreton ! Çò mai amusant es que ieu e Maria, la paissèla ajudaira, aviam pres lo ròtle de doas vielhòtas sens nos concertar… Totes amassa, fasiá una polida còla !

Vaor

La dimenjada contunhèri mon torn de carnavals e m’arrestèri aqueste còp a Vaor, dins Tarn, ont èra previst un passa-carrièra pel vilatge : batucada, palhassas e una fola desguisada que n’en podiás pas creire los uèlhses ! Aquí tanben, la creativitat, l’art e l’irreveréncia èran al rendètz-vos…

Lo Jutjament de Carnaval se faguèt pel prat al centre del vilatge. Es aquí lo còr de Vaor e de son festenal, «L’été de Vaour», que celèbra las arts de l’espectacle vivent dempuèi un vintenat d’annadas… Comprenèm que Carnaval pren tot son sens dins un vilatge costumièr del rire e de la poesia. Ongan ne manquèrem pas : lo discors del Jutjament, declamat per un palhassa, nos faguèt rire e plorar tant que mai ! Apuèi dos ans sens fèsta, sentissiam la jòia de nos trapar totes amassa… Rencontrèri un dels enfants de la Calandreta de Galhac, fièr coma tot de son desguisament, la banda d’adolescents del collègi de Sant-Antonin e los enfants dels copins qu’avián totes plan crescut ! Es aquò tanben la fòrça de las fèstas calendaras : ritualizar e celebrar lo viure amassa !

E la fèsta contunha amb un concèrt de hang-drum (n’aviái pas jamai ausit, quina descobèrta !), una sopa partejada e per clavar : un bal mirgalhat amb Forró da Lua !

Tolosa

A Còsta Pavada, la tradicion de Carnaval es plan enrasigada e participa a l’identitat de l’escòla. Familhas, calandrons e ancians calandrons mancan pas l’eveniment !

La fèsta se prepara pendent de setmanas, per un espectacle d’una ora balhat per la còla de CM2 e, plan segur, las intervencions de totas las classas e de las animatrises del C.L.A.E. Coma o vòl la tradicion, Òme Carnaval se’n pren plen lo morre e acaba sa vida a la fin del Jutjament… mas es per tornar l’an que ven !

Foguèt per ieu un polit moment d’escambis e de partatge : farandòla entre grands e pichons, fanfara de parents e aperitiu dins la cort de l’escòla… sens doblidar lo moment de dança entre collègas abans l’arribada dels pichons en «recre» !!

Carnaval es, dempuèi pichona, una fèsta que presi e que fa sens. Inversar los ròtles, se trufar de la morala e del «plan pensar», far la fèsta, rire e rire totjorn ! N’auriam pas de besonh per téner lo còp, ongan mai que pas jamai ?

Elisà Sigaud e la còla

Articles recommandés

Laisser un commentaire

Votre adresse e-mail ne sera pas publiée.