Lo pop-up en classa

Per impressionar enfants e parents e vos regalar lo long d’una sesilha d’arts visualas, vaquí una astúcia : montar un pop-up. Es aisit e la resulta despassa totas las esperanças !

Vos cal :

– de papièr (de color e cartonat, de preferéncia)

– de cisèls

– un gredon de papièr

– una règla

– de pega

– de feutres, de gredons de color o de pintura

Un exemple concret : illustrar la cançon Chut, chut, chut de La Talvera

L’an passat recuperèri l’idèia d’una autra regenta per poder illustrar la cançon Chut, chut, chut de La Talvera. S’i parla d’una man, doncas l’idèia èra de montar un pop-up de man. Lo faguèri en doas sesilhas e preparèri lo material aperabans.

Preparacion

1) Far un modèle que se presentarà al canton en debuta d’activitat – per los balhar enveja !!

2) Préner un fuèlh de papièr cartonat. Lo plegar en dos dins lo sens de la largor. Metre lo plec en fàcia de vos.

3) Amb la règla, traçar dos traches parallèls (a man drecha del fuèlh). Los traches son perpendiculars al plec e forman una benda de 4cm de long sus 3cm de larg.

4) Descopar la benda amb lo cisèl. Plegar la benda.

5) Virar lo fuèlh dins l’autre sens e lo desplegar. Vaquí la basa per montar lo pop-up !

6) Estampar e descopar las paraulas de la cançon (per las poder pegar a costat de la man).

Sesilha 1

Preveire un mièg-fuèlh de color (jaune per ieu) per cada pichon + de pintura bluga.

1) Far dessenhar (los ajudar s’es necessari) lor man als calandrons sul fuèlh, amb un gredon de papièr.

2) Descopar lo fuèlh en seguissent las linhas de la man.

3) Coloridar la man a la pintura o al feutre.

Sesilha 2

Preparacion del regent : pegar lo fuèlh cartonat dins los quasèrns de jorn dels calandrons, dins lo bon sens per que se pòsca dobrir coma un libre.

1) Tornar mostrar lo modèl, explicar ont se pegan la man e las paraulas.

2) Far pegar la man sus la benda descopada.

3) Pegar las paraulas a costat.

4) Dessenhar per decorar e/o pegar de pastilhas.

E pels mai grands…

… Pas de besonh de preparar lo fuèlh cartonat, son capables de far aquò solets ! Se pòt prepausar en sesilha d’arts visualas, amai permet de trabalhar las drechas parallèlas e perpendicularas.

Per ne saupre mai, podètz anar al ligam d’una video explicativa (malastrosament en francés).

Regalatz-vos !

Elisa Sigaud e la còla

Articles recommandés

1 commentaire

  1. Adieu Elisà,

    Mercé per aquela polida sesilha!
    Es notada dins ma programacion 🙂

Laisser un commentaire

Votre adresse e-mail ne sera pas publiée.